Зошто Холандија е дисквалификувана од Евровизија – Претставникот повикан на распит во полиција

Детали

сабота, 11 мај 2024

Првичните гласини беа дека е дисквалификуван заради односот кон израелската претставничка, а ЕБУ во соопштение појасни дека станува збор за сосема поинаква причина. Зошто претставникот на Холандија е дисквалификуван од Евровизија 2024?

Иако претставникот на Холандија Јост Клајн доби доволно гласови во рамки на втората полуфинална вечер, и се квалификуваше за финалето на Евровизија 2024, сепак, тој вечерва (11.05) нема да настапи, а земјата е дисквалификувана.

Првичните гласини дека Холандија ќе биде дисквалификувана почнаа да се шират уште вчера, кога Јост не настапи на генералната проба, а денес и ЕБУ излезе со официјално соопштение во кое информира дека земјата е дисквалификувана.

„Холандскиот претставник Јост Клајн нема да се натпреварува на големото финале на изборот за песна на Евровизија.

Шведската полиција во моментов врши истрага по поплака добиена од девојка која работи во продукцијата, по инцидент кој следувал по неговиот настап во четвртокот по полуфиналната вечер.

Додека трае легалниот процес, нема да биде соодветно тој да го продолжи натпреварувањето“ – се вели, меѓу другото, во соопштението од ЕБУ.

Според пишувањата во холандските медиуми, Јост Клајн по настапот во четвртокот ѝ се заканувал на вработена, а во петокот таа поднела пријава.

Холандскиот пејач исто така е повикан на распит во полиција, а јавниот обвинител треба да одлучи што ќе се случува понатаму со него.

Инаку, во текот на вчерашниот ден на социјалните мрежи се прошири веста дека Клајн е дисквалификуван заради неговото однесување за време на прес конференцијата на израелската претставничка Иден Голан.

Тој се прекри со знамето и се преправаше дека спие додека таа одговараше на прашањата поставени од новинарите. Слично како него и грчката претставничка за време на прес-конференцијата се преправаше дека спие.

Погледнете го настапот на Јост Клајн од втората полуфинална вечер:

Прочитајте и Не излегува без обезбедување, по Евросонг ќе оди во војска: Животната приказна на Израелката Иден Голан

Б. С. Б. | Црнобело