Луксузен фустан со 1.350 пердуви за ѕвездата на шоуто „Dubai Bling“, од нашиот дизајнер Златко Јовановски

„Јас го замислив во боја на лаванда, но Фархана Боди се реши за кралско сина. Тоа е долг фустан со уште пола метро шлеп. На истиот се рачно ставени околу 1.350 пердуви, еден по еден. Во горниот дел пердувите се дополнети со стакла и монистра“, вели нашиот дизајнер Златко Јовановски за неговата нова светска креација.

Фархана Боди, ѕвездата на шоуто „Dubai Bling“ што се емитува на Нетфликс, носеше креација од нашиот дизајнер Златко Јовановски на доделувањето на наградите Инфлуенсер на годината.

Златко и овој пат направи светски луксузен фустан, во боја на мастило, со пердуви, а креацијата е изработена специјално за Фархана.

„Вчера во Дубаи имаше црвен килим и доделување на наградите Инфлуенсер на годината. На тој настан Фархана облече моја креација, специјално направена за неа, надополнета со високи ракавици.

Ние добивме понуда од нејзиниот стилист и нормално дека ја прифативме без многу размислување.

Стилистот бараше фустан кој ќе биде долг и нема да открива многу, а истовремено да не треба да биде во боја на тенот на кожата.

Инсистираше и да има пердуви токму од тој вид што го користевме.

Јас направив пет дизајни, пет скици и тие го одбраа токму овој фустан.

Мене ми беше замислен првично во боја на лаванда, но Фархана се реши за кралско сина.

Тоа е долг фустан со плус пола метро шлеп.

На истиот се ставени рачно околу 1.350 пердуви, еден по еден. Во горниот дел пердувите се дополнети со стакла и монистра.

Ракавиците се тука за да го направат целиот изглед погламурозен. Таа го искомбинирала нашиот фустан со дијаманти и брилијанти“, вели Златко.

Тој открива и дека е голем фан на шоуто Dubai Bling и дека го следи и поради Дубаи, и поради модата што се презентира во самото шоу, како и нивните животи.

„Тоа се успешни млади луѓе кои имаат направено милиони и нивните проблеми се секогаш поинтересни од проблемите од моето секојдневие.

Меѓу другото, секоја епизода ‘вреска’ од луксуз, а јас уживам гледајќи ги“, додава нашиот дизајнер.

А. Ј. | Црнобело