Не сака домашни миленици и чисти кога сите ќе си легнат - Помалку познати факти за Дејвид Бекам

Детали

сабота, 18 мај 2024

Навечер, кога сите ќе си легнат, ја средува куќата, а најмногу се посветува на чистење на свеќите. Помалку познати факти за Дејвид Бекам.

Дејвид Бекам на 2 мај наполни 49 години, а и понатаму е еден од најзгодните мажи во светот.

Многу од помладите момчиња може да му позавидат на мускулестото тело, со кое редовно се фали на Инстаграм.

Пред 25 години, на вечна љубов ѝ се заколна на пејачката и дизајнерка Викторија Бекам.

Заедно имаат 4 деца: синовите Бруклин, Круз и Ромео и ќерката Харпер.

Колкаво богатство поседува?

Заедничкото богатство на Дејвид и Викторија достигна 1 милијарда долари благодарение на нејзината модна империја, неговата заработка од фудбалската кариера и нивните бизниси.

Викторија е сопственик на Victoria Beckham Ltd, а Дејвид има три фирми: Footwork Productions, Beckham Brand Holdings и DB Ventures Ltd.

Колку тетоважи има?

Неговото тело е покриено со речиси 80 тетоважи и повеќето од нив се посветени на неговото семејство.

Неговиот тату артист, Марк Махони, има изјавено дека Дејвид е совршен клиент бидејќи не чувствува болка и седи мирно додека го тетовираат.

Болести и стравови

Во документарниот филм „Beckham“ тој зборуваше за опсесивно-компулсивното нарушување од кое пати.

„Толку добро чистам, но не сум сигурен дека мојата сопруга баш го цени тоа. Кога навечер сите ќе си легнат, јас одам низ дома, ги чистам свеќите и гледам дали секаде е сѐ уредно“, призна Бекам.

Тој додава дека најмногу мрази кога наутро ќе се симне во кујната да има насекаде садови и дека најмногу го заморува чистењето на свеќите.

„Го сечам изгорениот восок од свеќите, ги чистам стаклата, а тука е мојата одбивност кон домашните миленици. Знам, чудно е“, изјави тој.

Дејвид страда и од орнитофобија, односно страв од птици.

Омилено јадење

Омиленото јадење на Дејвид е деликатес од источен Лондон од пита и пире со прилог јагула во желе.

Кога живеел во Париз, никаде не можел да го најде овој специјалитет, па побарал да му го доставуваат во хотелот.

Истото го правел и додека играл за Реал Мадрид.

 

Во добри односи е со кралското семејство

Дејвид и неговата сопруга Викторија со години се поврзани со кралското семејство. 

Тие се дружат со принцезата Кејт и принцот Вилијам, како и со неговиот брат Хари.

Бекамови присуствуваа и на свадбите на двајцата принцови.

С. Ш. | Црнобело / фото: Инстаграм